Euse Läbenslauf

Eso hetts agfange………
Also agfange hett eigentlich alles scho einigi Johr vor dr Gründig vo euserer Guggemuusig. Nachdäm nämmlich die Meischte vo de Iniziante vo dr Agfrässeni-Clique z Basel ihri Lehr gmacht hei, isch me o i dr Freiziit hüffig zämmeghoggt und hett mänggs zämme ungernoh. So si mer natürlich o zämme a d Fasnacht. Vom Schmutzige Donnschtig ewäg hei mer s Dornegg, s Schwarzbuebeland und natürlich o s Laufetal heigsuecht. Z Laufe sälber isch i sällere Ziit (Afangs bis Mitti Sächzgerjohre) nimm viil Betriib gsi. Die legendäre grosse Umzüg si am verschwinde gsi und gli emool isch numme no d Pfluderi-Fäger-Clique uf dr Gass gsi. Si hei e mänggs Johr vor leerem Schtedtli pfiffe und trummelet. Mir Kolleege si nach wie vor alls wilde Huffe ungerwägs gsi...
Churz vor dr Fasnacht 1966 hei mir bi mir Dehei mi zwänzigschte Geburtstag mit ere Party gfiirt. S isch cho, wie’s hett miesse, während ere Poloneese dur die ganzi Wohnig hei mer uf em Chaschte vom Brueder e Posune entdeggt. Jede und jedi hett emool gluegt, öbs Töön dinne hett – und siihe da, si hett no töönt. Jä und wie gseit es isch churz vor dr Fasnacht gsi und plötzlich isch allne klar gsi: Mir göh als Guggemuusig a d’Fasnacht!
Dangg Beziehige zu dr Schtadtmuusig, hei mer dörfe alti Inschtrumänt vo ihne bruche: und so si mer denn usgrüschtet gsi. Mir, das isch e chline Huffe gsi. Nach em Zuezug vo wiitere Kolleege si mer denn sälbscht Siibt (s chönnte o mehr oder weniger gsi si – uf jede Fall i deere Grössenordnig) mit de Inschtrumänt a d Fasnacht go schpiile.
D Koschtüüm hei mer us dr Mottechischte vo dr Muetter zämmegschtellt. Ohni Proob, aber mit eme Ateil Musiger, hei mer denn Gschtägreiflet und si im Gänselimarsch vo einer Beiz i die Angeri, vom Schtedtli zum Bahnhof und wiider zrugg. Es isch e tolli Sach gsi und vili Bekannti hei gseit, machet witter, mit chömme s’nechschte Johr o.
Und eso hei mer denn d Fasnacht 1967 vorbereitet, hei d Koschtüm und d Larve sälber gmacht. Das handhabe mer o hütt no so. Wäge me Todesfall, hei mer denn die Fasnacht allerdings usgloh, eus aber im Summer 1967 mit eme Fescht gründet.
D Fasnacht und schpeziell d Guggemuusig hett eus komplett i Bann zoge. Scho im Summer hei mer jewils vo dr Fasnacht gschwätzt, eso ass eus d’Lüüt gseit hei: „Dir sit denn agfässeni Sieche“. Jo und eso si mer o zumene Name cho: Agfrässeni-Clique Laufe.
Wie isch’s denn wiitergange………
Die nechschte Fasnächt si prägt gsi vom Ufbau vo dr Clique und vo dr Laufner Fasnacht. Mit de Pfluderi-Fäger zämme hei mir ehemaligi Clique wider reanimiert und scho gli isch z Laufe wider e Umzug gloffe. Johr für Johr hei sich mehr und mehr Teilnämer gmäldet. S Resultat dörf sich absolut gseh loh. Zämme hett me o e Morgestreich organisiert. Nach eme Johr Alaufschwirigkeite hett s denn aber klappt und mir hei am Sunntig am Morge am Föifi d Fasnacht eröffnet. Vo Afang a mit Pfiife, Trummle und Guggemuusig.
Jä und mir, mir si kontinuierlich gwachse und si denn gli emol vor dr Entscheidig gschtange, ob mer wei Fraue i d Clique ufnäh oder nid. Gottlob hei mer!!! Es hett e harzige Diskussion drzue gäh, aber schlussändlich isch d Mehrheit drfür gsi.
E mängge intärne Schturm hett euse junge Verein beutlet und s isch a mängger Versammlig hitzig und lutt zuegange. Es hett Zuewachs und es hett Abgäng gäh. So si nid wenigi vo de Laufner Guggemuusige eigentlich vo ehemalige Agfrässene gründet worde.
Mit de Pfluderi-Fäger zämme hei mer s erschte Fasnachtscomité uf d Bei gschtellt und als Mitglied drvo o aggtiv mitgholfe d Laufner Fasnacht z präge und z entwickle.
Jä und denne……..
Die erschte Fasnächt und d Fasnachstsumzüg sälli Zit dörf me nid mit dr hüttige Fasnacht vergliiche. D Zahl vo de aktive Fasnächtler isch no überblickbar gsi – d Koschtüm eher no bescheide – drfür isch d Vorfreud uf d Fasnacht no ungemein grösser gsi als hütt. Die Schpannig vor em Morgeschtreich, ändlich dörfe is Koschtüm zschtige und s Warte vo mene ganze Johr hett sich am Morgeschtreich mit ere Explosion befreit. Logisch, sälli Ziit hesch usser dr Fasnachtsziit und ab und zue eme intärne Ständeli kei „Fasnachtsmusig“ ghört. Hütt chasch boll a jedere Hundsverlochete fasnächtlichi Tön ghöre.
Nach em Umzug und vor allem z Nacht si d Beize voll gsi. Hesch welle d Schnitzelbänggler lose, bisch scho am sächsi Zobe ineghoggt zum sicher e Plätzli ha. A dr Wiiberfasnacht amene Mendig z Nacht isch amme sone Druggete gsi, ass de als Aktive lieber e paar Schtung Pause gmacht hesch.
Die Meischte vo eus si denn no als Einzelmasgge oder chlises Grüppli, verchleidet und mit Requisite, uf dr Pischte gsi go wirgge. Nachäre hett me sich wieder troffe und isch bis am Morge zämmebliibe und hett güget was obeabe het möge.
Will d Beize scho am Zwöi am Morge zuegmacht hei, si mer bis das besser worde isch, i Bahnhofwartsaal go hogge zum d Ziit z’totschlo. Und nid sälte si d Bachschtube vo de Beggereie noch churz heigsuecht worde, Gipfeli und öppis z Tringge si eus immer willkomme gsi.
Am Mendig z Mittag isch no überhaupt nüt los gsi: tote Hose. Also, si mer s erschti Johr halt ohni Koschtüm is Schtedtli (schliesslich hei mer jo Ferie gha) quasi go rekognosziere, si denn im Lämmli is Sääli ghoggt und hei dr Umzug vo dr Luzärner Fasnacht inezooge.
S zwöite Johr si mer denn im Koschtüm gange (und vo de Lüüt teilwiis schreeg agluegt worde); schpiile hei mer aber erscht im dritte Johr traue. Vo Johr zu Johr hetts denn mehr Maskierti gha, bis dr Mentig e vollwärtige Fasnachtstag worde isch. Dr Umzug isch o vo Johr zu Johr grösser und qualitativ besser worde, eso ass d Laufner Fasnacht uf gsunge Bei zschtoh cho isch.
Jä und fascht hätt is vergässe, d Gugge-Gala isch o dur e Idee vo euserer Clique entschtange, zerscht am Zischdig nach em Umzug und wo s immer mehr Gugge gäh hett, isch me uf e Mendig usgwiche.
E Huffe isch no bassiert……….
Mir hei chrampfhaft e Chäller oder e Lokal gsuecht, wo mer hei chönne schaffe und zämme hogge. Nach 4 Aalöif si mer im Pavillon am Meiersackerwäg glandet und fühle eus üsserscht wohl. Dört si mer hütt no Dehei: zum Schaffe und zum Feschte. Apropos schaffe: sit em Afang vo euserer Clique tie mer d Koschtüm sälber mache (me cha s natürlich o vo-n-ere Schniidere loh näie). Mir mache d Larve no immer sälber: vo dr Lätteform über s Negativ zum fertige zwöite Gsicht. Und scho mänggisch isch s am Samschtig lenger als Föifi Zobe worde, will me no e „chli“ zämmeghoggt isch, e Zvieri gässe und s eifach schön gha hett zämme!Jedes Johr e nöiis Koschtüm und e nöii Larve! Was meinsch wie gross mi Fasnachts-Chaschte isch…. Mit de Eigekreatione für a Morgeschtreich (s nöiie Koschtüm wird natürli erscht am Umzug agleit) si wit über 40 Koschtüm und glichvil Larve zämmecho. Uf ere angere Sitte vo dere Houmpeitsch chasch eusi Galerie aluege: vo de Afäng bis zur „Nöizit“. Und eis cha ni als „Dino“ vo dere Clique säge: wenn de nach so vilne Johre immer no dr Plausch hesch a dr Agfrässeni-Clique, denn muess es e guete Verein si. Und wenn s jedes Johr wider e Hampfle „Jungi“ drzue gitt, wirdsch geischtig sicher nit alt………..
Laufe im Mai 2005 Jö